Upinnaqtuq Taliqpiani Katimajiit Kiggaqtuijiit Kanataup Kiggaqtuqtinga Miaji Saiman, 30-Gijanganik Kuin Kiggaqtuqtingata Kanatami

Angiqtitaunirmut Uqausiksat

Iqqagijaqattiaqłunga, ilisaqsiniqarumavunga ullumi nikurravingagatta sakkuimmaittumik pijunnautimminni nunangani iulgaankuin Anisnaapimmiut Inunginni, inuusiqarvigisimajangat kamagittiaqługulu tamanna nunarjuami nunait ilangata arraagugasaalunnut tausatinut tikiusimaliqtuni.

Kanatami Angajuqqaamut Minista Turuutumut, qujannamiik uppirigavinnga ammalu piliriqatauniit tamatumunga saimmaqatigiingnirmuungajunut. Upigusullarippunga, pijjujjiniariaksaq mikillitiqsimallunga tamatumunga atuinnauvungalu Kanatami sivulliqpaulunga Nunaqaqqaaqsimajuulunga kuinmut kiggaqtuqtiuniarnirnit.

Ullumi tavvaniinnivut angijualummik ippigusugutigivara. Arraagut 39 aniguqsimaliqtut, tamanna Gavamakkut Katimmavigijummagu, iqqanaijaaqalauqsimajunga asinnik Nunaqaqqaaqsimajunut Sivuliqtinit ammalu Sivulliqpaat Ministait pijunnautivut nalunaiqtausimaqullugit Kanataup Piqujarjuangani. Taitsumani tamannaulauqsimajuq ullumi taassumanngat ajurnangitittivuq.

Uummatinniinngaaqtumik qujannamiirumavara Kuin Kiggaqtuqtinut Kanatami, Kuin uvannik tatiqarmat sulijuringmaangalu. Qaujimajara surrajuittumik naglingnilik tamatumunga nunaapittinnu.

Ilajannut; qujannamiiqpara uiga, Vuit, qiturngakka, Ritsut, Lui, ammalu Kaurul, qiturngaksakkanut, Raanta, Tiaan ammalu Uitni, qatanngatinnut, ammaluttau, piqataulutik, irngutakka ammalu ilulikka. Iluunnasi sanngijuugutigisimavassi, pinasuagaqarutigillusi, naglinirmik ammalu piviarnaqłusi qaujijakkut inuusirni.

Kanatami Unataqtuksalirijinut, upigusukpunga pinasuagaqarnianirnik angajuqqaangunirmik−unataqtuksanut Kanatami. Qujannamiiqtunga nalunaiqsisimagassi tukinganik pijjujjiniup, sivuurannginniup pijittirarniullu kiggaqtuqsugit Kanatamiutalimaat. Asuillaarutaunisi ammalu sapinnginnisi atuqtauqujaulluni quttiktummiiqatauvuq nalunaiqsigutaullunilu pinasuattiarunnainnaunittinnik. Taikkua pijittiqtut unataqtuksanut, umiarjuakkut unataqtuksalirijiit, tingmijuukkut Unataqtuksalirijiit Ammalu Kanatami Unataqtusakkut ammalu Asingit Pijitsiqtiujumaaqtut tamakkununga ulluni aggiqtuni.

Taimangat tusaqtittigutaulauqtillugu tilijaunira, aktuqtausimallarikpunga ilukkut kiugutaujunut uqausiksarijaujunullu Kanatamiutanut uvannut ikajuqtaugumaqattaqsimajunut.

• Tusaqattaqsimagama Kanatamiutait uqausiqaqtillugit nutausikkanniqtumik ajurnangittuqtigut pijunnarninginnik nunavut kanata ammalu pinasuagarilugu katikkanniquniaqpakka inuuqatigiit
• Tusaqattaqsimagama Kanatamiutaujunik uvannik pijugaqsaitillugit savvaiqullunga nutaamik amma nutausiqtumik pinasuaqtangata titirarvingani kuip kiggaqtuqtingata ikajuqtauqullugit Kanatamiutait pinasuarvigilugit tamakkua isumaaluutauvaktut.
• Tusaqattaqsimagama Kanatamiutanit uvannik ikajuqtuiniraqłutik miksaanut ilinniarumanirma Uiviititut, allaaluunniit ikajurumaliqłutik nangminiq ilinniaqtittilutik uvannik!
• Tusaqattaqsimallungalu Kanatamiutaujunit Riitu ᕼaallik inungnut najugauninganik−pimariqutigijaujunik takuksautittiviungmat, pinasuarunnarninginnit ammalu asijjigiingiłłutiguurninginnik Kanatamiutauqatigiit.

Qujalittiaqpakka tamakkua uqausiit ikajuqtuijut ammalu sivuliqtunik tamatumunga.

Kuinmut kiggatuqtiuniarlunga, angiqsimaniqaqpunga pinasuarniriniaqtannik ammalu pijunnatalimaakkut iqqanaijaariniaqtara ammalu atuagangit maliglugit pinasuagariniaqtakka pillugit.

Ullumi pimmariujumik atuqpugut atuqtaulauqsimanialirmijumik Kanatamut. Kisiani unikkaara, Taakkununga katimajinut, pingialauqsimangmat tamannaulaurniusajjatinnagu.

Inuullunga Miaji Jiini Maimik atiqaqtitaulauqtunga ukiuqtaqtungani Nunavingmit. Inuktitut atira Ningiukallak.

Innarurataaqqamiułłunga Nunavimmiungulauqsimavunga, inuusiqaqłunga piqqusituqaq inuusirijanganni angijuqqaama. Anaanaga Naansi, inuulluni. Ataataga Paap, qallunaaniinngaaqsimalluni, angajuqqaarijaulauqsimajuq nunalittinni ᕼatsan Paikunnut.

Taqrirasannik silatuinnamiippakłuta ukiulimaaq nunami inuusiqaqłuta−nuktiqpakłuta qimuksikut umiakkuluunniit ... angunasuaqłuta, iqalugasuaqłuta niqiksariniaqtatinnillu nuattivakłuta

Arraaguuni aniguqłuni unikkaaqatiqaqattaqsimavunga Kanatamiunik unikkausiqaqłuta quviagiqattaqsimajattinnik piruqsaqłuta. Unali nangminira unikkaarillugu: nalallunga ilavaarikłuta tupittinni sinaani Kangiqsualujjuap, iliqaqłuta qijuktaanik tukturajannilu, tusarannaapakłunga upanuat qaaqqiliqtillugit, ammalu aputiup siqalivalunga qimmiit aullatitta tutivallagit.

Upiginirpaarali puigurniangittara piruqsajaunivinira angijuqqaakkanut ilinniaqtittiłłutik qatanngutikkanillu qanuq inuusiqariaqalirmangaatta marruunni nunarjuannik − Inuit nunarjuangat ammalu inummik−iliqqusiqanngittut qallunaaniinngaaqsimajut nunarjuangat.

Tamakkuninga tunngaviqaqsimanira piruqsaqtaugutigisimajannik ilinniaqtitaugutigisimajarnik tamakkiinnut pijittinirmut ammalu sanajaugutigisimavara inuusirni, ammalu sulijuqsaqpunga ikajuqtaugutigisimagakku pigiarutigillugu makkuktuullunga, kappiasugunniirama ilirasugunniiqłunga.

Akuni nangmini−sulijurilirasuaqsimavunga pijunnarnirarlunga ammalu uppirijakka nunaqaqqaaqsimajuunngittu−qallunaat iliqqusingata nunarjuangani. Kisiani tukisilirama nipiga pijunnarniqarunnaqtuq ammalu asika uvannut saaqattalirmata nipiqaqtitaugumallutik, sivuuraniriqattaqsimajara aniguqtisimajara.

Uqausirngautiga− Inuktitut− uqauqasiq nalunaiqsilluni inungnit, ammalu tunngavigijaulluni annaumanittinnut.

Tungilia uqausirma−Qallunaatitut−aqqusiuqsimajuq uvannut nunarjuaqtaqarninganik ungataanut.

Ammalu maanna, angiqsimaniqaqpunga ilaliutigumallugu tungilia uqausip ilisarijausimajuq Kanatami, Uiviitituurniq.

Ullumiujuq atuqsimajatuqariliqtavut amisut uqausiit ilagingmagit aktuaqatigiingnitta nunarjuatinni, taimaimmatattauq unikaangusimajut taikkununga Kanatamuuqtuvinirnut qiniqłutik nutaamik inuusirmik.

Kinguninganiuliqtuq, ukiukka avatinginniilirataaqtillugit Manturiialmiutaullunga, iqqanaijalauqsimagama Siipiisiikkunut, qaujillunga uqalimaaqpalliallunga tukiliurinirnik pivalliajunik inungnut naalaktunut ikaaqługu ukiuqtaqtuq pivalliajut unikkaat nunarjuami.

Kisianili taimanngalimaaq ajauqtuqtauvunga inuusirni asianut−pimmariuningata mamisariaqarniup qanuinngittiariaqarniullu ilinniarnikkut, saqqitittinikkut kikkutuinnait pillugit atuagaksauniaqtunik, tikillugu maligaliurvingmiinnirmut, aaqqigiarlugit piusigiarlugit ilinniarutilianguvaktut, nipiqaqtittiniq tikillugu inuup timiliup pijunnautingit pillugit.

Piqatauqattarunnaqsimavunga iqqanaijaqłunga aulaqattaqataunirmik aullakatakłunga nunait killiliuqtausimaningitta nunalinginnut qallunaani ammalu nunait aviktuqtausimaningitigut nunanut. Iqqaumaginiqpaarijarali katimanirnik pingiłłunga uvvaluunniit katimasinnaat ilinniaqatigiikkanniujunik, kisianili uavutigiinningit piqqusiqaqatigiinngittut ammalu inuusiqaqsimausingit sivulingita Kanataup tamajja qaumaninga nunarjuami.

Puigulauqsimaniangitara ingminniinnaq isumaginatik iqqanaijaqpaktut Kanatamiutait nalianni taakkua nunalirjuat atunik. Qautamaat, iluanni nirukittut nunalimmi pinngaarvinni, pinngaarvinginni ilinniarviit, unaliksajakkut Kanatami liijanginni, tuksiarviuvaktuni, ammalu amisut tausanginniittut nunalingminni pijittiqtut timiunirmigut, Kanatamiutatuinnait tapairnaqtunik pilirijut.

Kuinmut kiggaqtuqtiuniarlunga tamanna tautugunniijjaanngitara − ingminiinnaq isumaginnginnivut sannginirigattigu nunaliuqatigiingulluta.

Angiqpunga atuinnaulunga pijittirniarama Kanatamiutalimaanik.

Kanata ukiuqtaqtumi nunaliungmat. Ukiuqtaqtuvullu ajjiungituuqataungmat nunani nunarjuami−uirngasaakkut nirliqauqsuni tikiłługu ukimut taarnialirmijumut, ilagijaulluni tulaaviuvaktuq nirjutinut uumajunut numituinnaq nunami. Ukiuqtaqtuvut inuusiqarviuttiaqtuq amma inuunasuarviulluni nunagijaulluni Inungnut, Allanut Nunaqaqqaaqsimajunut ammalu Ikilinut.

Ukiuqtaqtuq ippigijaullaringmat Kanatamut nunarjuamullu. Kanata sivukkataqsimangmat saqqiqtauninginnik taakkua Ukiuqtaqtumut Katimajiit ammalu qitiqpasianut tariumi Iqalulirinirmut Angiqatigiigutiup. Angiqatigiigutiqauratta inungnit. Kajusitisimajavut taanna Ukiuqtaqtup Imanginnik Suruittailimanirmut Piqujaq nauttiqturutaulluni nangminiqarniq tamassuminga Aqqummik Imakkut, ammalu saqqitittilluni ukiuqtaqtumi uuktuutausimajunik atuagatuqarmingnut, ilisaqsinilimmik inuup timiliup qanuingittuugiaqarninga ilaliujjausimajariaqarmat avatimik qanuingittiatittinirmik.

Arraagugasannut, Kanata aktuqtausimalirmat silaup asijjirninganut pillugu ukiuqtaqtuq nirumiksikautigiqattalirmat sukanniqpaamik nalianni nunaliit taimaitinnagit nunami. Ukiuqtaqtu tikiusimagalaqłunik 40−mut nunauniqutittinnik, aujakkut sikuqaqattangituinnariaqaliqtuq ukiuni aggiqtuni.

Nunarjuami tamakkiinnut tuavirnaqtumiiliqtuunnut nunaup surakpallianinganut ammalu silaup asijjiqpallianinganut qularnangittumik aksururutiginiaqtavut. Takujaugumakpat, takugiatuinnariaqaqtugut ukiuqtaqtumik, qanuittuqalaurmangaaq taqqirilauqtatinni kanatami; aktuinirlusiaqtut napaaqtuit ikualaningit, akuniuluaqtuq panirninga nunaup, quvvasinniqpaanik kiaqaqłuni uqquunikumut.

Sulijuqsaqpunga sivuniksaqattiarumagutta qanuingittiaqtumik, isumasivut aaqqigiakkanniriaqaqtavut tukisiumaniarattigu nuna iniummat ammalu tavvaruqtittivangmat silattinnik. Silavut inuunasuarviugunnaqtuq inuusiqarviuluni ajurnangitittijuq, inuunasuarvitinnilu makimautigivavut.

Kuinmut Kiggaqtuqtiuniarlunga Kanatami, atuqtauliqujiniaqpunga ilitarijaulutillu sivuliqattaqsimajut nunalimmi ammalu nunaqaqqaaqsimajuuniq−pillugu piuqsuaqattaqsimajut silalu pillugu aulajjagiaqsimajut pivaallirutaullarikłutik ammalu ijjuaqtaugumalirunnaqtut Kanatamiutait taimaassainna aulajjaqullugit tamatumunga. Tamakkua qaujijautigumagaluaqpakka atuliqtaulutillu atuqtauqattaqsimajut  Kanatamiutanut sivuliqattaqsimajut kanatami ammalu nunarjualimaami.

Takunnaqattainnaqsimajara Kanata ajjiugianganik ilagiinut.

Ilagijaulluta amisunut ammalu ajjigiingittunut Kanatamiutanut ilagiinut, inangiriaqalirattingu aanniqtauniviniq niriunniqarnirmut ammalu nanilugu nikagijauniq ammalu katujjiqatigiigunnarniq nangiqatigiilluta sivumuagiarluta akauniqsamut ammalu ajjigiitittijumut sivuniksamut.

Uqausirilugu isumaliriniq ammalu qanuingittiariaqarningita ilatta, ilinniavitta, iqqanaijarvitta ammalu iqqanaijaqtiuvaktut kamagianganiqpaullutik pijittirautitigut aksurunnarmat ammalu pijariaqalliriktuulluni iqqanaijaangulluni, kisiani isumagikkit atuqtaulirunnaqtut sangniqsaulirlutik, ilusittiarinniqsaulirlutillu makippalliatsiarlutik nunaliit.

Ilisarijumavakka Kanatamiutalimaat ingminnik ikpigiguniiqłutik ulurianaqtumiigunnariaksaq piuliniagaqarnirmut pijariaqarniq pillugu pijittirautitigut qanimannarjuaqtaqarningani uvagut ulurianaqtumiiqunata. Pijittiqsimagassi uvagut angiqraqsimaqujautilluta. Qujannamiik.

Kuinmut kiggaqtuqtigijaulunga, pijittiniaqpunga taanna atuqtavut maannaujumi aturlugu kanatami nunaliqarvitta atuqtaulauqsimanialirmiluni pivalliajaukkanniqullugu iqqanaijaanguningata mikilliqtiqtaunirivaktanga−aaqqigiarlugu isumaliriniup takunnaqtaungaarniarmat timikkut aannianguninganittauq, taimaassainarlu kamagijaujjutauluni, ippigijautsiarlutik tukisiajaulutillu.

Taimanganik Sulijumik Killisiniarnirmut ammalu Aaqqiqatigiingnirmut unikkaaliuqtuqalauqsimatillugu arraagut arvinilit aniguqtuni, ilittittimaliratta nunalirjuanguluta ilinniariaqariaksatinnik pilariktumik atulauqsimajumik Kanatami. Ikpigittiaqsimalugu tamanna suliniq sannginiqsautittingmat Kanatamiungunittinnik, atausiuqatigiiliqtisilluni kanatamiutanik ammalu ilinniatiqtittini surusittinik taimangalimaaq pinasuattiarunnaqtattigut pinasuariaqarnitinnik, piluaqtumi aksururnaqtuuliraikpat.

Qaujijaurataarningit nalunaiqsimangittut kikkuviniungmangaata iluviqtausimajut iningani ilinniariaqtitaqattaliqtillugit najugaujunut ilinniavingnut pinasuarusiurataajujuni iqqaumainnaliqsimagakkit, Kanatamiutauqatikkalu taimaimmijut.

Amisut inuit isumangmata aaqqigiarnimut saimmaqatigiinniarniq iqqanaiqtauniarmat piliriatigut ammalu pijittirautitigut. Kanatamiutalimaat pijittirautitigut pijittiraqtauttiariaqaqput atuinnaqarlutillu tamakkuninga.

Takunnaqtara saimmaqatigiingniq inuusiriqasiutigattigu ammalu qautamaat pijaksariqasiutinginnaqłutigu. Saimmaqatigiingniq qaujiqattautilirniummat inuuqatimik.

Uqausiusimangmat tavvani Sulijumik Killisiniarnirmut ammalu Saimmaqatigiingnirmut Tilisijjutiminirmi unikkaaliangusimajumi:

"Saimmaqatigiingniq ikajuqtuijariaqaqpuq Nunaqaqqaaqsimajunik aaqqipallianinginni mamisarnikkut surattaugutausimajunut atuqtauqattaqsimajutigut sivulirijaujunut nungutitaugasuarnikkut suraisimattiaqtunik quvianangituqtigut inuusinginni."

Qautamaat iqqaititaujugut asijjigiingittuuniq tunngaviullarimmat Kanatamiutanut pimmariqutigijaulluni, kanata pilirikkanniriaqaqpuq iqqagittiarlugit uqausilimaat, piqqusirijaujut, nakinngaaqsimaniit, ukpiqtuuniit ammalu inuunasuarusiit piusirmigut.

Kuinmut kiggatuqtigijaulunga, kiggaturniaqpara nunalitta ajjigiinginninga ammalu angiqsimaningat. Sulijuriinnaqsimagakku Taliqpimmi Katimaji Kim Kaampul Kanatami makimatittingmat uqarami imaak, “Kanata angirrarijauvuq ajjigiitittijunut, sulijuqsaqtunut ammalu ukpirijamigut inuusiqarunnaqtunik. ” ilisarilugu atausiq tallimani kanatamiutait inuuliqsimangmata asiani Kanataup, pimmariugiakkaniqpuq tamassumunga angiqsimakkanniriaqarnirmik aturluta.

Tamanna tavvaniinnitta tukinga kiumut kiggaqtuqtiuniarlunga, aksururutiginiaqpara tigumianginnaqtauqullugu kingunittiniiliqtut sivuniksattiaqaqulluta, silatuvuq ammalu isumatuniulluni.

Inuqutivut ilisaqsigiaqarmata ugguriqattaqsimajattinnik, tamakkutiguuna upigiliqsimalluta, pijjutigillugu piviqaqtittingmat mamisarnirmut, angirutiqarnirmut ammalu sulijuqsalikkanniqullugu tatiqalikkanirnirmut. Ajuinnaarutiqarniaqpunga tamakkua ikaarusiurlugit ajjigiingittuunirmik inuusiqarniit ammalu iliqqusiqarniit kinaunittinnik takuksautittijut nunalirjuangunititnik ajjiqanngittumi ammalu sivunirmut qularnangittuuningit.

Angiqpunga katiqatigigumaniarlugit Kanatamiutalimaat nunaliillu aviktausimanikkut iligumallunga sivulliqpaami−taakkunangat inungnik suummangaata atuqtangit, qanurlu aaqqigiaqtaugunnarmangaata inuusiqattiakanniniqsauqullugit.

Sanngininginnut taikkua kiggatuqtiuqattaqsimajut sivunirni pijittiqattaqsimajut, tunivunga Kanatamiunut sivumut pinasuarniarama mikillitiqsimalunga pijjutigijaralu sivunirilugu tamanna tavvaniinnitta tukinga kajusiniqarniarmat iqqaiqattalaalirmijavut ilaliutilaarmat atulauqsimajattinnut.

Vuitlu, qimmivullu, Niva, quviasukpugut upiqqaqłutalu Ritu ᕼaalmi ilagiilluta angirraqarviginiarattigu. Parnaqasiutingmijugut Sittatalmillu iqqanaijarluta Nunalipaujangani Kupaip.

Upigusullarikpunga tamatumunga tilijaugama pijittiqullunga pijunnaqtakkut pinasuattiarniarivunga qautamaat tamanna tilijaujjutiganga kajusitittiarniarakku.

Qujannamiik. Miaqsii. Miguats. Nakurmiik.