ᐅᐱᓐᓇᖅᑐᖅ ᑕᓕᖅᐱᐊᓂ ᑲᑎᒪᔩᑦ ᑭᒡᒐᖅᑐᐃᔩᑦ ᑲᓇᑕᐅᑉ ᑭᒡᒐᖅᑐᖅᑎᖓ ᒥᐊᔨ ᓴᐃᒪᓐ,
30-ᒋᔭᖓᓂᒃ ᑯᐃᓐ ᑭᒡᒐᖅᑐᖅᑎᖓᑕ ᑲᓇᑕᒥ
ᐊᖏᖅᑎᑕᐅᓂᕐᒧᑦ ᐅᖃᐅᓯᒃᓴᑦ
ᐃᖅᑲᒋᔭᖃᑦᑎᐊᖅᖢᖓ, ᐃᓕᓴᖅᓯᓂᖃᕈᒪᕗᖓ ᐅᓪᓗᒥ ᓂᑯᕐᕋᕕᖓᒐᑦᑕ ᓴᒃᑯᐃᒻᒪᐃᑦᑐᒥᒃ ᐱᔪᓐᓇᐅᑎᒻᒥᓐᓂ ᓄᓇᖓᓂ ᐃᐅᓪᒑᓐᑯᐃᓐ ᐊᓂᔅᓈᐱᒻᒥᐅᑦ ᐃᓄᖏᓐᓂ, ᐃᓅᓯᖃᕐᕕᒋᓯᒪᔭᖓᑦ ᑲᒪᒋᑦᑎᐊᖅᖢᒍᓗ ᑕᒪᓐᓇ ᓄᓇᕐᔪᐊᒥ ᓄᓇᐃᑦ ᐃᓚᖓᑕ ᐊᕐᕌᒍᒐᓵᓗᓐᓄᑦ ᑕᐅᓴᑎᓄᑦ ᑎᑭᐅᓯᒪᓕᖅᑐᓂ.
ᑲᓇᑕᒥ ᐊᖓᔪᖅᑳᒧᑦ ᒥᓂᔅᑕ ᑐᕉᑐᒧᑦ, ᖁᔭᓐᓇᒦᒃ ᐅᑉᐱᕆᒐᕕᙵ ᐊᒻᒪᓗ ᐱᓕᕆᖃᑕᐅᓃᑦ ᑕᒪᑐᒧᖓ ᓴᐃᒻᒪᖃᑎᒌᖕᓂᕐᒨᖓᔪᓄᑦ. ᐅᐱᒍᓱᓪᓚᕆᑉᐳᖓ, ᐱᔾᔪᔾᔨᓂᐊᕆᐊᒃᓴᖅ ᒥᑭᓪᓕᑎᖅᓯᒪᓪᓗᖓ ᑕᒪᑐᒧᖓ ᐊᑐᐃᓐᓇᐅᕗᖓᓗ ᑲᓇᑕᒥ ᓯᕗᓪᓕᖅᐸᐅᓗᖓ ᓄᓇᖃᖅᑳᖅᓯᒪᔫᓗᖓ ᑯᐃᓐᒧᑦ ᑭᒡᒐᖅᑐᖅᑎᐅᓂᐊᕐᓂᕐᓂᑦ.
ᐅᓪᓗᒥ ᑕᕝᕙᓃᓐᓂᕗᑦ ᐊᖏᔪᐊᓗᒻᒥᒃ ᐃᑉᐱᒍᓱᒍᑎᒋᕙᕋ. ᐊᕐᕌᒍᑦ 39 ᐊᓂᒍᖅᓯᒪᓕᖅᑐᑦ, ᑕᒪᓐᓇ ᒐᕙᒪᒃᑯᑦ ᑲᑎᒻᒪᕕᒋᔪᒻᒪᒍ, ᐃᖅᑲᓇᐃᔮᖃᓚᐅᖅᓯᒪᔪᖓ ᐊᓯᓐᓂᒃ ᓄᓇᖃᖅᑳᖅᓯᒪᔪᓄᑦ ᓯᕗᓕᖅᑎᓂᑦ ᐊᒻᒪᓗ ᓯᕗᓪᓕᖅᐹᑦ ᒥᓂᔅᑕᐃᑦ ᐱᔪᓐᓇᐅᑎᕗᑦ ᓇᓗᓇᐃᖅᑕᐅᓯᒪᖁᓪᓗᒋᑦ ᑲᓇᑕᐅᑉ ᐱᖁᔭᕐᔪᐊᖓᓂ. ᑕᐃᑦᓱᒪᓂ ᑕᒪᓐᓇᐅᓚᐅᖅᓯᒪᔪᖅ ᐅᓪᓗᒥ ᑖᔅᓱᒪᙵᑦ ᐊᔪᕐᓇᖏᑎᑦᑎᕗᖅ.
ᐆᒻᒪᑎᓐᓃᙶᖅᑐᒥᒃ ᖁᔭᓐᓇᒦᕈᒪᕙᕋ ᑯᐃᓐ ᑭᒡᒐᖅᑐᖅᑎᓄᑦ ᑲᓇᑕᒥ, ᑯᐃᓐ ᐅᕙᓐᓂᒃ ᑕᑎᖃᕐᒪᑦ ᓱᓕᔪᕆᖕᒫᖓᓗ. ᖃᐅᔨᒪᔭᕋ ᓱᕐᕋᔪᐃᑦᑐᒥᒃ ᓇᒡᓕᖕᓂᓕᒃ ᑕᒪᑐᒧᖓ ᓄᓈᐱᑦᑎᓐᓄ.
ᐃᓚᔭᓐᓄᑦ; ᖁᔭᓐᓇᒦᖅᐸᕋ ᐅᐃᒐ, ᕗᐃᑦ, ᕿᑐᕐᖓᒃᑲ, ᕆᑦᓱᑦ, ᓗᐃ, ᐊᒻᒪᓗ ᑲᐅᕈᓪ, ᕿᑐᕐᖓᒃᓴᒃᑲᓄᑦ, ᕌᓐᑕ, ᑎᐋᓐ ᐊᒻᒪᓗ ᐅᐃᑦᓂ, ᖃᑕᙵᑎᓐᓄᑦ, ᐊᒻᒪᓗᑦᑕᐅ, ᐱᖃᑕᐅᓗᑎᒃ, ᐃᕐᖑᑕᒃᑲ ᐊᒻᒪᓗ ᐃᓗᓕᒃᑲ. ᐃᓘᓐᓇᓯ ᓴᙱᔫᒍᑎᒋᓯᒪᕙᔅᓯ, ᐱᓇᓱᐊᒐᖃᕈᑎᒋᓪᓗᓯ, ᓇᒡᓕᓂᕐᒥᒃ ᐊᒻᒪᓗ ᐱᕕᐊᕐᓇᖅᖢᓯ ᖃᐅᔨᔭᒃᑯᑦ ᐃᓅᓯᕐᓂ.
ᑲᓇᑕᒥ ᐅᓇᑕᖅᑐᒃᓴᓕᕆᔨᓄᑦ, ᐅᐱᒍᓱᒃᐳᖓ ᐱᓇᓱᐊᒐᖃᕐᓂᐊᓂᕐᓂᒃ ᐊᖓᔪᖅᑳᖑᓂᕐᒥᒃ−ᐅᓇᑕᖅᑐᒃᓴᓄᑦ ᑲᓇᑕᒥ. ᖁᔭᓐᓇᒦᖅᑐᖓ ᓇᓗᓇᐃᖅᓯᓯᒪᒐᔅᓯ ᑐᑭᖓᓂᒃ ᐱᔾᔪᔾᔨᓂᐅᑉ, ᓯᕘᕋᙱᓐᓂᐅᑉ ᐱᔨᑦᑎᕋᕐᓂᐅᓪᓗ ᑭᒡᒐᖅᑐᖅᓱᒋᑦ ᑲᓇᑕᒥᐅᑕᓕᒫᑦ. ᐊᓱᐃᓪᓛᕈᑕᐅᓂᓯ ᐊᒻᒪᓗ ᓴᐱᙱᓐᓂᓯ ᐊᑐᖅᑕᐅᖁᔭᐅᓪᓗᓂ ᖁᑦᑎᒃᑐᒻᒦᖃᑕᐅᕗᖅ ᓇᓗᓇᐃᖅᓯᒍᑕᐅᓪᓗᓂᓗ ᐱᓇᓱᐊᑦᑎᐊᕈᓐᓇᐃᓐᓇᐅᓂᑦᑎᓐᓂᒃ. ᑕᐃᒃᑯᐊ ᐱᔨᑦᑎᖅᑐᑦ ᐅᓇᑕᖅᑐᒃᓴᓄᑦ, ᐅᒥᐊᕐᔪᐊᒃᑯᑦ ᐅᓇᑕᖅᑐᒃᓴᓕᕆᔩᑦ, ᑎᖕᒥᔫᒃᑯᑦ ᐅᓇᑕᖅᑐᒃᓴᓕᕆᔩᑦ ᐊᒻᒪᓗ ᑲᓇᑕᒥ ᐅᓇᑕᖅᑐᓴᒃᑯᑦ ᐊᒻᒪᓗ ᐊᓯᖏᑦ ᐱᔨᑦᓯᖅᑎᐅᔪᒫᖅᑐᑦ ᑕᒪᒃᑯᓄᖓ ᐅᓪᓗᓂ ᐊᒡᒋᖅᑐᓂ.
ᑕᐃᒪᖓᑦ ᑐᓴᖅᑎᑦᑎᒍᑕᐅᓚᐅᖅᑎᓪᓗᒍ ᑎᓕᔭᐅᓂᕋ, ᐊᒃᑐᖅᑕᐅᓯᒪᓪᓚᕆᒃᐳᖓ ᐃᓗᒃᑯᑦ ᑭᐅᒍᑕᐅᔪᓄᑦ ᐅᖃᐅᓯᒃᓴᕆᔭᐅᔪᓄᓪᓗ ᑲᓇᑕᒥᐅᑕᓄᑦ ᐅᕙᓐᓄᑦ ᐃᑲᔪᖅᑕᐅᒍᒪᖃᑦᑕᖅᓯᒪᔪᓄᑦ.
- ᑐᓴᖃᑦᑕᖅᓯᒪᒐᒪ ᑲᓇᑕᒥᐅᑕᐃᑦ ᐅᖃᐅᓯᖃᖅᑎᓪᓗᒋᑦ ᓄᑕᐅᓯᒃᑲᓐᓂᖅᑐᒥᒃ ᐊᔪᕐᓇᖏᑦᑐᖅᑎᒍᑦ ᐱᔪᓐᓇᕐᓂᖏᓐᓂᒃ ᓄᓇᕗᑦ ᑲᓇᑕ ᐊᒻᒪᓗ ᐱᓇᓱᐊᒐᕆᓗᒍ ᑲᑎᒃᑲᓐᓂᖁᓂᐊᖅᐸᒃᑲ ᐃᓅᖃᑎᒌᑦ.
- ᑐᓴᖃᑦᑕᖅᓯᒪᒐᒪ ᑲᓇᑕᒥᐅᑕᐅᔪᓂᒃ ᐅᕙᓐᓂᒃ ᐱᔪᒐᖅᓴᐃᑎᓪᓗᒋᑦ ᓴᕝᕙᐃᖁᓪᓗᖓ ᓄᑖᒥᒃ ᐊᒻᒪ ᓄᑕᐅᓯᖅᑐᒥᒃ ᐱᓇᓱᐊᖅᑕᖓᑕ ᑎᑎᕋᕐᕕᖓᓂ ᑯᐃᑉ ᑭᒡᒐᖅᑐᖅᑎᖓᑕ ᐃᑲᔪᖅᑕᐅᖁᓪᓗᒋᑦ ᑲᓇᑕᒥᐅᑕᐃᑦ ᐱᓇᓱᐊᕐᕕᒋᓗᒋᑦ ᑕᒪᒃᑯᐊ ᐃᓱᒫᓘᑕᐅᕙᒃᑐᑦ.
- ᑐᓴᖃᑦᑕᖅᓯᒪᒐᒪ ᑲᓇᑕᒥᐅᑕᓂᑦ ᐅᕙᓐᓂᒃ ᐃᑲᔪᖅᑐᐃᓂᕋᖅᖢᑎᒃ ᒥᒃᓵᓄᑦ ᐃᓕᓐᓂᐊᕈᒪᓂᕐᒪ ᐅᐃᕖᑎᑐᑦ, ᐊᓪᓛᓘᓐᓃᑦ ᐃᑲᔪᕈᒪᓕᖅᖢᑎᒃ ᓇᖕᒥᓂᖅ ᐃᓕᓐᓂᐊᖅᑎᑦᑎᓗᑎᒃ ᐅᕙᓐᓂᒃ!
- ᑐᓴᖃᑦᑕᖅᓯᒪᓪᓗᖓᓗ ᑲᓇᑕᒥᐅᑕᐅᔪᓂᑦ ᕇᑐ ᕼᐋᓪᓕᒃ ᐃᓄᖕᓄᑦ ᓇᔪᒐᐅᓂᖓᓂᒃ−ᐱᒪᕆᖁᑎᒋᔭᐅᔪᓂᒃ ᑕᑯᒃᓴᐅᑎᑦᑎᕕᐅᖕᒪᑦ, ᐱᓇᓱᐊᕈᓐᓇᕐᓂᖏᓐᓂᑦ ᐊᒻᒪᓗ ᐊᓯᔾᔨᒌᖏᖦᖢᑎᒎᕐᓂᖏᓐᓂᒃ ᑲᓇᑕᒥᐅᑕᐅᖃᑎᒌᑦ.
ᖁᔭᓕᑦᑎᐊᖅᐸᒃᑲ ᑕᒪᒃᑯᐊ ᐅᖃᐅᓰᑦ ᐃᑲᔪᖅᑐᐃᔪᑦ ᐊᒻᒪᓗ ᓯᕗᓕᖅᑐᓂᒃ ᑕᒪᑐᒧᖓ.
ᑯᐃᓐᒧᑦ ᑭᒡᒐᑐᖅᑎᐅᓂᐊᕐᓗᖓ, ᐊᖏᖅᓯᒪᓂᖃᖅᐳᖓ ᐱᓇᓱᐊᕐᓂᕆᓂᐊᖅᑕᓐᓂᒃ ᐊᒻᒪᓗ ᐱᔪᓐᓇᑕᓕᒫᒃᑯᑦ ᐃᖅᑲᓇᐃᔮᕆᓂᐊᖅᑕᕋ ᐊᒻᒪᓗ ᐊᑐᐊᒐᖏᑦ ᒪᓕᒡᓗᒋᑦ ᐱᓇᓱᐊᒐᕆᓂᐊᖅᑕᒃᑲ ᐱᓪᓗᒋᑦ.
ᐅᓪᓗᒥ ᐱᒻᒪᕆᐅᔪᒥᒃ ᐊᑐᖅᐳᒍᑦ ᐊᑐᖅᑕᐅᓚᐅᖅᓯᒪᓂᐊᓕᕐᒥᔪᒥᒃ ᑲᓇᑕᒧᑦ. ᑭᓯᐊᓂ ᐅᓂᒃᑳᕋ, ᑖᒃᑯᓄᖓ ᑲᑎᒪᔨᓄᑦ, ᐱᖏᐊᓚᐅᖅᓯᒪᖕᒪᑦ ᑕᒪᓐᓇᐅᓚᐅᕐᓂᐅᓴᔾᔭᑎᓐᓇᒍ.
ᐃᓅᓗᖓ ᒥᐊᔨ ᔩᓂ ᒪᐃᒥᒃ ᐊᑎᖃᖅᑎᑕᐅᓚᐅᖅᑐᖓ ᐅᑭᐅᖅᑕᖅᑐᖓᓂ ᓄᓇᕕᐅᑉ. ᐃᓄᒃᑎᑐᑦ ᐊᑎᕋ ᓂᖏᐅᑲᓪᓚᒃ.
ᐃᓐᓇᕈᕋᑖᖅᑲᒥᐅᖦᖢᖓ ᓄᓇᕕᒻᒥᐅᖑᓚᐅᖅᓯᒪᕗᖓ, ᐃᓅᓯᖃᖅᖢᖓ ᐱᖅᑯᓯᑐᖃᖅ ᐃᓅᓯᕆᔭᖓᓐᓂ ᐊᖏᔪᖅᑳᒪ. ᐊᓈᓇᒐ ᓈᓐᓯ, ᐃᓅᓪᓗᓂ. ᐊᑖᑕᒐ ᐹᑉ, ᖃᓪᓗᓈᓃᙶᖅᓯᒪᓪᓗᓂ, ᐊᖓᔪᖅᑳᕆᔭᐅᓚᐅᖅᓯᒪᔪᖅ ᓄᓇᓕᑦᑎᓐᓂ ᕼᐊᑦᓴᓐ ᐸᐃᑯᓐᓄᑦ.
ᑕᖅᕆᕋᓴᓐᓂᒃ ᓯᓚᑐᐃᓐᓇᒦᑉᐸᒃᖢᑕ ᐅᑭᐅᓕᒫᖅ ᓄᓇᒥ ᐃᓅᓯᖃᖅᖢᑕ−ᓄᒃᑎᖅᐸᒃᖢᑕ ᕿᒧᒃᓯᑯᑦ ᐅᒥᐊᒃᑯᓘᓐᓃᑦ...ᐊᖑᓇᓱᐊᖅᖢᑕ, ᐃᖃᓗᒐᓱᐊᖅᖢᑕ ᓂᕿᒃᓴᕆᓂᐊᖅᑕᑎᓐᓂᓪᓗ ᓄᐊᑦᑎᕙᒃᖢᑕ.
ᐊᕐᕌᒎᓂ ᐊᓂᒍᖅᖢᓂ ᐅᓂᒃᑳᖃᑎᖃᖃᑦᑕᖅᓯᒪᕗᖓ ᑲᓇᑕᒥᐅᓂᒃ ᐅᓂᒃᑲᐅᓯᖃᖅᖢᑕ ᖁᕕᐊᒋᖃᑦᑕᖅᓯᒪᔭᑦᑎᓐᓂᒃ ᐱᕈᖅᓴᖅᖢᑕ. ᐅᓇᓕ ᓇᖕᒥᓂᕋ ᐅᓂᒃᑳᕆᓪᓗᒍ: ᓇᓚᓪᓗᖓ ᐃᓚᕚᕆᒃᖢᑕ ᑐᐱᑦᑎᓐᓂ ᓯᓈᓂ ᑲᖏᖅᓱᐊᓗᔾᔪᐊᑉ, ᐃᓕᖃᖅᖢᑕ ᕿᔪᒃᑖᓂᒃ ᑐᒃᑐᕋᔭᓐᓂᓗ, ᑐᓴᕋᓐᓈᐸᒃᖢᖓ ᐅᐸᓄᐊᑦ ᖄᖅᑭᓕᖅᑎᓪᓗᒋᑦ, ᐊᒻᒪᓗ ᐊᐳᑎᐅᑉ ᓯᖃᓕᕙᓗᖓ ᕿᒻᒦᑦ ᐊᐅᓪᓚᑎᑦᑕ ᑐᑎᕙᓪᓚᒋᑦ.
ᐅᐱᒋᓂᕐᐹᕋᓕ ᐳᐃᒍᕐᓂᐊᖏᑦᑕᕋ ᐱᕈᖅᓴᔭᐅᓂᕕᓂᕋ ᐊᖏᔪᖅᑳᒃᑲᓄᑦ ᐃᓕᓐᓂᐊᖅᑎᑦᑎᖦᖢᑎᒃ ᖃᑕᙳᑎᒃᑲᓂᓪᓗ ᖃᓄᖅ ᐃᓅᓯᖃᕆᐊᖃᓕᕐᒪᖔᑦᑕ ᒪᕐᕉᓐᓂ ᓄᓇᕐᔪᐊᓐᓂᒃ − ᐃᓄᐃᑦ ᓄᓇᕐᔪᐊᖓᑦ ᐊᒻᒪᓗ ᐃᓄᒻᒥᒃ−ᐃᓕᖅᑯᓯᖃᙱᑦᑐᑦ ᖃᓪᓗᓈᓃᙶᖅᓯᒪᔪᑦ ᓄᓇᕐᔪᐊᖓᑦ.
ᑕᒪᒃᑯᓂᖓ ᑐᙵᕕᖃᖅᓯᒪᓂᕋ ᐱᕈᖅᓴᖅᑕᐅᒍᑎᒋᓯᒪᔭᓐᓂᒃ ᐃᓕᓐᓂᐊᖅᑎᑕᐅᒍᑎᒋᓯᒪᔭᕐᓂᒃ ᑕᒪᒃᑮᓐᓄᑦ ᐱᔨᑦᑎᓂᕐᒧᑦ ᐊᒻᒪᓗ ᓴᓇᔭᐅᒍᑎᒋᓯᒪᕙᕋ ᐃᓅᓯᕐᓂ, ᐊᒻᒪᓗ ᓱᓕᔪᖅᓴᖅᐳᖓ ᐃᑲᔪᖅᑕᐅᒍᑎᒋᓯᒪᒐᒃᑯ ᐱᒋᐊᕈᑎᒋᓪᓗᒍ ᒪᒃᑯᒃᑑᓪᓗᖓ, ᑲᑉᐱᐊᓱᒍᓐᓃᕋᒪ ᐃᓕᕋᓱᒍᓐᓃᖅᖢᖓ.
ᐊᑯᓂ ᓇᖕᒥᓂ−ᓱᓕᔪᕆᓕᕋᓱᐊᖅᓯᒪᕗᖓ ᐱᔪᓐᓇᕐᓂᕋᕐᓗᖓ ᐊᒻᒪᓗ ᐅᑉᐱᕆᔭᒃᑲ ᓄᓇᖃᖅᑳᖅᓯᒪᔫᙱᑦᑐ−ᖃᓪᓗᓈᑦ ᐃᓕᖅᑯᓯᖓᑕ ᓄᓇᕐᔪᐊᖓᓂ. ᑭᓯᐊᓂ ᑐᑭᓯᓕᕋᒪ ᓂᐱᒐ ᐱᔪᓐᓇᕐᓂᖃᕈᓐᓇᖅᑐᖅ ᐊᒻᒪᓗ ᐊᓯᑲ ᐅᕙᓐᓄᑦ ᓵᖃᑦᑕᓕᕐᒪᑕ ᓂᐱᖃᖅᑎᑕᐅᒍᒪᓪᓗᑎᒃ, ᓯᕘᕋᓂᕆᖃᑦᑕᖅᓯᒪᔭᕋ ᐊᓂᒍᖅᑎᓯᒪᔭᕋ.
ᐅᖃᐅᓯᕐᖓᐅᑎᒐ− ᐃᓄᒃᑎᑐᑦ− ᐅᖃᐅᖃᓯᖅ ᓇᓗᓇᐃᖅᓯᓪᓗᓂ ᐃᓄᖕᓂᑦ, ᐊᒻᒪᓗ ᑐᙵᕕᒋᔭᐅᓪᓗᓂ ᐊᓐᓇᐅᒪᓂᑦᑎᓐᓄᑦ.
ᑐᖏᓕᐊ ᐅᖃᐅᓯᕐᒪ−ᖃᓪᓗᓈᑎᑐᑦ−ᐊᖅᑯᓯᐅᖅᓯᒪᔪᖅ ᐅᕙᓐᓄᑦ ᓄᓇᕐᔪᐊᖅᑕᖃᕐᓂᖓᓂᒃ ᐅᖓᑖᓄᑦ.
ᐊᒻᒪᓗ ᒫᓐᓇ, ᐊᖏᖅᓯᒪᓂᖃᖅᐳᖓ ᐃᓚᓕᐅᑎᒍᒪᓪᓗᒍ ᑐᖏᓕᐊ ᐅᖃᐅᓯᑉ ᐃᓕᓴᕆᔭᐅᓯᒪᔪᖅ ᑲᓇᑕᒥ, ᐅᐃᕖᑎᑑᕐᓂᖅ.
ᐅᓪᓗᒥᐅᔪᖅ ᐊᑐᖅᓯᒪᔭᑐᖃᕆᓕᖅᑕᕗᑦ ᐊᒥᓱᑦ ᐅᖃᐅᓰᑦ ᐃᓚᒋᖕᒪᒋᑦ ᐊᒃᑐᐊᖃᑎᒌᖕᓂᑦᑕ ᓄᓇᕐᔪᐊᑎᓐᓂ, ᑕᐃᒪᐃᒻᒪᑕᑦᑕᐅᖅ ᐅᓂᑳᖑᓯᒪᔪᑦ ᑕᐃᒃᑯᓄᖓ ᑲᓇᑕᒨᖅᑐᕕᓂᕐᓄᑦ ᕿᓂᖅᖢᑎᒃ ᓄᑖᒥᒃ ᐃᓅᓯᕐᒥᒃ.
ᑭᖑᓂᖓᓂᐅᓕᖅᑐᖅ, ᐅᑭᐅᒃᑲ ᐊᕙᑎᖏᓐᓃᓕᕋᑖᖅᑎᓪᓗᒋᑦ ᒪᓐᑐᕇᐊᓪᒥᐅᑕᐅᓪᓗᖓ, ᐃᖅᑲᓇᐃᔭᓚᐅᖅᓯᒪᒐᒪ ᓰᐲᓰᒃᑯᓄᑦ, ᖃᐅᔨᓪᓗᖓ ᐅᖃᓕᒫᖅᐸᓪᓕᐊᓪᓗᖓ ᑐᑭᓕᐅᕆᓂᕐᓂᒃ ᐱᕙᓪᓕᐊᔪᓂᒃ ᐃᓄᖕᓄᑦ ᓈᓚᒃᑐᓄᑦ ᐃᑳᖅᖢᒍ ᐅᑭᐅᖅᑕᖅᑐᖅ ᐱᕙᓪᓕᐊᔪᑦ ᐅᓂᒃᑳᑦ ᓄᓇᕐᔪᐊᒥ.
ᑭᓯᐊᓂᓕ ᑕᐃᒪᙵᓕᒫᖅ ᐊᔭᐅᖅᑐᖅᑕᐅᕗᖓ ᐃᓅᓯᕐᓂ ᐊᓯᐊᓄᑦ−ᐱᒻᒪᕆᐅᓂᖓᑕ ᒪᒥᓴᕆᐊᖃᕐᓂᐅᑉ ᖃᓄᐃᙱᑦᑎᐊᕆᐊᖃᕐᓂᐅᓪᓗ ᐃᓕᓐᓂᐊᕐᓂᒃᑯᑦ, ᓴᖅᑭᑎᑦᑎᓂᒃᑯᑦ ᑭᒃᑯᑐᐃᓐᓇᐃᑦ ᐱᓪᓗᒋᑦ ᐊᑐᐊᒐᒃᓴᐅᓂᐊᖅᑐᓂᒃ, ᑎᑭᓪᓗᒍ ᒪᓕᒐᓕᐅᕐᕕᖕᒦᓐᓂᕐᒧᑦ, ᐋᖅᑭᒋᐊᕐᓗᒋᑦ ᐱᐅᓯᒋᐊᕐᓗᒋᑦ ᐃᓕᓐᓂᐊᕈᑎᓕᐊᖑᕙᒃᑐᑦ, ᓂᐱᖃᖅᑎᑦᑎᓂᖅ ᑎᑭᓪᓗᒍ ᐃᓅᑉ ᑎᒥᓕᐅᑉ ᐱᔪᓐᓇᐅᑎᖏᑦ ᐱᓪᓗᒋᑦ.
ᐱᖃᑕᐅᖃᑦᑕᕈᓐᓇᖅᓯᒪᕗᖓ ᐃᖅᑲᓇᐃᔭᖅᖢᖓ ᐊᐅᓚᖃᑦᑕᖃᑕᐅᓂᕐᒥᒃ ᐊᐅᓪᓚᑲᑕᒃᖢᖓ ᓄᓇᐃᑦ ᑭᓪᓕᓕᐅᖅᑕᐅᓯᒪᓂᖏᑦᑕ ᓄᓇᓕᖏᓐᓄᑦ ᖃᓪᓗᓈᓂ ᐊᒻᒪᓗ ᓄᓇᐃᑦ ᐊᕕᒃᑐᖅᑕᐅᓯᒪᓂᖏᑎᒍᑦ ᓄᓇᓄᑦ. ᐃᖅᑲᐅᒪᒋᓂᖅᐹᕆᔭᕋᓕ ᑲᑎᒪᓂᕐᓂᒃ ᐱᖏᖦᖢᖓ ᐅᕝᕙᓘᓐᓃᑦ ᑲᑎᒪᓯᓐᓈᑦ ᐃᓕᓐᓂᐊᖃᑎᒌᒃᑲᓐᓂᐅᔪᓂᒃ, ᑭᓯᐊᓂᓕ ᐅᐊᕗᑎᒌᓐᓂᖏᑦ ᐱᖅᑯᓯᖃᖃᑎᒌᙱᑦᑐᑦ ᐊᒻᒪᓗ ᐃᓅᓯᖃᖅᓯᒪᐅᓯᖏᑦ ᓯᕗᓕᖏᑕ ᑲᓇᑕᐅᑉ ᑕᒪᔾᔭ ᖃᐅᒪᓂᖓ ᓄᓇᕐᔪᐊᒥ.
ᐳᐃᒍᓚᐅᖅᓯᒪᓂᐊᖏᑕᕋ ᐃᖕᒥᓐᓃᓐᓇᖅ ᐃᓱᒪᒋᓇᑎᒃ ᐃᖅᑲᓇᐃᔭᖅᐸᒃᑐᑦ ᑲᓇᑕᒥᐅᑕᐃᑦ ᓇᓕᐊᓐᓂ ᑖᒃᑯᐊ ᓄᓇᓕᕐᔪᐊᑦ ᐊᑐᓂᒃ. ᖃᐅᑕᒫᑦ, ᐃᓗᐊᓐᓂ ᓂᕈᑭᑦᑐᑦ ᓄᓇᓕᒻᒥ ᐱᙳᐊᕐᕕᓐᓂ, ᐱᙳᐊᕐᕕᖏᓐᓂ ᐃᓕᓐᓂᐊᕐᕖᑦ, ᐅᓇᓕᒃᓴᔭᒃᑯᑦ ᑲᓇᑕᒥ ᓖᔭᖏᓐᓂ, ᑐᒃᓯᐊᕐᕕᐅᕙᒃᑐᓂ, ᐊᒻᒪᓗ ᐊᒥᓱᑦ ᑕᐅᓴᖏᓐᓃᑦᑐᑦ ᓄᓇᓕᖕᒥᓐᓂ ᐱᔨᑦᑎᖅᑐᑦ ᑎᒥᐅᓂᕐᒥᒍᑦ, ᑲᓇᑕᒥᐅᑕᑐᐃᓐᓇᐃᑦ ᑕᐸᐃᕐᓇᖅᑐᓂᒃ ᐱᓕᕆᔪᑦ.
ᑯᐃᓐᒧᑦ ᑭᒡᒐᖅᑐᖅᑎᐅᓂᐊᕐᓗᖓ ᑕᒪᓐᓇ ᑕᐅᑐᒍᓐᓃᔾᔮᙱᑕᕋ−ᐃᖕᒥᓃᓐᓇᖅ ᐃᓱᒪᒋᙱᓐᓂᕗᑦ ᓴᙱᓂᕆᒐᑦᑎᒍ ᓄᓇᓕᐅᖃᑎᒌᖑᓪᓗᑕ.
ᐊᖏᖅᐳᖓ ᐊᑐᐃᓐᓇᐅᓗᖓ ᐱᔨᑦᑎᕐᓂᐊᕋᒪ ᑲᓇᑕᒥᐅᑕᓕᒫᓂᒃ.
ᑲᓇᑕ ᐅᑭᐅᖅᑕᖅᑐᒥ ᓄᓇᓕᐅᖕᒪᑦ. ᐅᑭᐅᖅᑕᖅᑐᕗᓪᓗ ᐊᔾᔨᐅᖏᑑᖃᑕᐅᖕᒪᑦ ᓄᓇᓂ ᓄᓇᕐᔪᐊᒥ−ᐅᐃᕐᖓᓵᒃᑯᑦ ᓂᕐᓕᖃᐅᖅᓱᓂ ᑎᑭᖦᖢᒍ ᐅᑭᒧᑦ ᑖᕐᓂᐊᓕᕐᒥᔪᒧᑦ, ᐃᓚᒋᔭᐅᓪᓗᓂ ᑐᓛᕕᐅᕙᒃᑐᖅ ᓂᕐᔪᑎᓄᑦ ᐆᒪᔪᓄᑦ ᓄᒥᑐᐃᓐᓇᖅ ᓄᓇᒥ. ᐅᑭᐅᖅᑕᖅᑐᕗᑦ ᐃᓅᓯᖃᕐᕕᐅᑦᑎᐊᖅᑐᖅ ᐊᒻᒪ ᐃᓅᓇᓱᐊᕐᕕᐅᓪᓗᓂ ᓄᓇᒋᔭᐅᓪᓗᓂ ᐃᓄᖕᓄᑦ, ᐊᓪᓚᓄᑦ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᐃᑭᓕᓄᑦ.
ᐅᑭᐅᖅᑕᖅᑐᖅ ᐃᑉᐱᒋᔭᐅᓪᓚᕆᖕᒪᑦ ᑲᓇᑕᒧᑦ ᓄᓇᕐᔪᐊᒧᓪᓗ. ᑲᓇᑕ ᓯᕗᒃᑲᑕᖅᓯᒪᖕᒪᑦ ᓴᖅᑭᖅᑕᐅᓂᖏᓐᓂᒃ ᑖᒃᑯᐊ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐊᒻᒪᓗ ᕿᑎᖅᐸᓯᐊᓄᑦ ᑕᕆᐅᒥ ᐃᖃᓗᓕᕆᓂᕐᒧᑦ ᐊᖏᖃᑎᒌᒍᑎᐅᑉ. ᐊᖏᖃᑎᒌᒍᑎᖃᐅᕋᑦᑕ ᐃᓄᖕᓂᑦ. ᑲᔪᓯᑎᓯᒪᔭᕗᑦ ᑖᓐᓇ ᐅᑭᐅᖅᑕᖅᑐᑉ ᐃᒪᖏᓐᓂᒃ ᓱᕈᐃᑦᑕᐃᓕᒪᓂᕐᒧᑦ ᐱᖁᔭᖅ ᓇᐅᑦᑎᖅᑐᕈᑕᐅᓪᓗᓂ ᓇᖕᒥᓂᖃᕐᓂᖅ ᑕᒪᔅᓱᒥᖓ ᐊᖅᑯᒻᒥᒃ ᐃᒪᒃᑯᑦ, ᐊᒻᒪᓗ ᓴᖅᑭᑎᑦᑎᓪᓗᓂ ᐅᑭᐅᖅᑕᖅᑐᒥ ᐆᒃᑑᑕᐅᓯᒪᔪᓂᒃ ᐊᑐᐊᒐᑐᖃᕐᒥᖕᓄᑦ, ᐃᓕᓴᖅᓯᓂᓕᒻᒥᒃ ᐃᓅᑉ ᑎᒥᓕᐅᑉ ᖃᓄᐃᖏᑦᑑᒋᐊᖃᕐᓂᖓ ᐃᓚᓕᐅᔾᔭᐅᓯᒪᔭᕆᐊᖃᕐᒪᑦ ᐊᕙᑎᒥᒃ ᖃᓄᐃᖏᑦᑎᐊᑎᑦᑎᓂᕐᒥᒃ.
ᐊᕐᕌᒍᒐᓴᓐᓄᑦ, ᑲᓇᑕ ᐊᒃᑐᖅᑕᐅᓯᒪᓕᕐᒪᑦ ᓯᓚᐅᑉ ᐊᓯᔾᔨᕐᓂᖓᓄᑦ ᐱᓪᓗᒍ ᐅᑭᐅᖅᑕᖅᑐᖅ ᓂᕈᒥᒃᓯᑲᐅᑎᒋᖃᑦᑕᓕᕐᒪᑦ ᓱᑲᓐᓂᖅᐹᒥᒃ ᓇᓕᐊᓐᓂ ᓄᓇᓖᑦ ᑕᐃᒪᐃᑎᓐᓇᒋᑦ ᓄᓇᒥ. ᐅᑭᐅᖅᑕᖅᑐ ᑎᑭᐅᓯᒪᒐᓚᖅᖢᓂᒃ 40−ᒧᑦ ᓄᓇᐅᓂᖁᑎᑦᑎᓐᓂᒃ, ᐊᐅᔭᒃᑯᑦ ᓯᑯᖃᖃᑦᑕᖏᑐᐃᓐᓇᕆᐊᖃᓕᖅᑐᖅ ᐅᑭᐅᓂ ᐊᒡᒋᖅᑐᓂ.
ᓄᓇᕐᔪᐊᒥ ᑕᒪᒃᑮᓐᓄᑦ ᑐᐊᕕᕐᓇᖅᑐᒦᓕᖅᑑᓐᓄᑦ ᓄᓇᐅᑉ ᓱᕋᒃᐸᓪᓕᐊᓂᖓᓄᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖁᓚᕐᓇᖏᑦᑐᒥᒃ ᐊᒃᓱᕈᕈᑎᒋᓂᐊᖅᑕᕗᑦ. ᑕᑯᔭᐅᒍᒪᒃᐸᑦ, ᑕᑯᒋᐊᑐᐃᓐᓇᕆᐊᖃᖅᑐᒍᑦ ᐅᑭᐅᖅᑕᖅᑐᒥᒃ, ᖃᓄᐃᑦᑐᖃᓚᐅᕐᒪᖔᖅ ᑕᖅᑭᕆᓚᐅᖅᑕᑎᓐᓂ ᑲᓇᑕᒥ; ᐊᒃᑐᐃᓂᕐᓗᓯᐊᖅᑐᑦ ᓇᐹᖅᑐᐃᑦ ᐃᑯᐊᓚᓂᖏᑦ, ᐊᑯᓂᐅᓗᐊᖅᑐᖅ ᐸᓂᕐᓂᖓ ᓄᓇᐅᑉ, ᖁᕝᕙᓯᓐᓂᖅᐹᓂᒃ ᑭᐊᖃᖅᖢᓂ ᐅᖅᑰᓂᑯᒧᑦ.
ᓱᓕᔪᖅᓴᖅᐳᖓ ᓯᕗᓂᒃᓴᖃᑦᑎᐊᕈᒪᒍᑦᑕ ᖃᓄᐃᖏᑦᑎᐊᖅᑐᒥᒃ, ᐃᓱᒪᓯᕗᑦ ᐋᖅᑭᒋᐊᒃᑲᓐᓂᕆᐊᖃᖅᑕᕗᑦ ᑐᑭᓯᐅᒪᓂᐊᕋᑦᑎᒍ ᓄᓇ ᐃᓂᐅᒻᒪᑦ ᐊᒻᒪᓗ ᑕᕝᕙᕈᖅᑎᑦᑎᕙᖕᒪᑦ ᓯᓚᑦᑎᓐᓂᒃ. ᓯᓚᕗᑦ ᐃᓅᓇᓱᐊᕐᕕᐅᒍᓐᓇᖅᑐᖅ ᐃᓅᓯᖃᕐᕕᐅᓗᓂ ᐊᔪᕐᓇᖏᑎᑦᑎᔪᖅ, ᐃᓅᓇᓱᐊᕐᕕᑎᓐᓂᓗ ᒪᑭᒪᐅᑎᒋᕙᕗᑦ.
ᑯᐃᓐᒧᑦ ᑭᒡᒐᖅᑐᖅᑎᐅᓂᐊᕐᓗᖓ ᑲᓇᑕᒥ, ᐊᑐᖅᑕᐅᓕᖁᔨᓂᐊᖅᐳᖓ ᐃᓕᑕᕆᔭᐅᓗᑎᓪᓗ ᓯᕗᓕᖃᑦᑕᖅᓯᒪᔪᑦ ᓄᓇᓕᒻᒥ ᐊᒻᒪᓗ ᓄᓇᖃᖅᑳᖅᓯᒪᔫᓂᖅ−ᐱᓪᓗᒍ ᐱᐅᖅᓱᐊᖃᑦᑕᖅᓯᒪᔪᑦ ᓯᓚᓗ ᐱᓪᓗᒍ ᐊᐅᓚᔾᔭᒋᐊᖅᓯᒪᔪᑦ ᐱᕚᓪᓕᕈᑕᐅᓪᓚᕆᒃᖢᑎᒃ ᐊᒻᒪᓗ ᐃᔾᔪᐊᖅᑕᐅᒍᒪᓕᕈᓐᓇᖅᑐᑦ ᑲᓇᑕᒥᐅᑕᐃᑦ ᑕᐃᒫᔅᓴᐃᓐᓇ ᐊᐅᓚᔾᔭᖁᓪᓗᒋᑦ ᑕᒪᑐᒧᖓ. ᑕᒪᒃᑯᐊ ᖃᐅᔨᔭᐅᑎᒍᒪᒐᓗᐊᖅᐸᒃᑲ ᐊᑐᓕᖅᑕᐅᓗᑎᓪᓗ ᐊᑐᖅᑕᐅᖃᑦᑕᖅᓯᒪᔪᑦ ᑲᓇᑕᒥᐅᑕᓄᑦ ᓯᕗᓕᖃᑦᑕᖅᓯᒪᔪᑦ ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥ.
ᑕᑯᓐᓇᖃᑦᑕᐃᓐᓇᖅᓯᒪᔭᕋ ᑲᓇᑕ ᐊᔾᔨᐅᒋᐊᖓᓂᒃ ᐃᓚᒌᓄᑦ.
ᐃᓚᒋᔭᐅᓪᓗᑕ ᐊᒥᓱᓄᑦ ᐊᒻᒪᓗ ᐊᔾᔨᒌᖏᑦᑐᓄᑦ ᑲᓇᑕᒥᐅᑕᓄᑦ ᐃᓚᒌᓄᑦ, ᐃᓇᖏᕆᐊᖃᓕᕋᑦᑎᖑ ᐋᓐᓂᖅᑕᐅᓂᕕᓂᖅ ᓂᕆᐅᓐᓂᖃᕐᓂᕐᒧᑦ ᐊᒻᒪᓗ ᓇᓂᓗᒍ ᓂᑲᒋᔭᐅᓂᖅ ᐊᒻᒪᓗ ᑲᑐᔾᔨᖃᑎᒌᒍᓐᓇᕐᓂᖅ ᓇᖏᖃᑎᒌᓪᓗᑕ ᓯᕗᒧᐊᒋᐊᕐᓗᑕ ᐊᑲᐅᓂᖅᓴᒧᑦ ᐊᒻᒪᓗ ᐊᔾᔨᒌᑎᑦᑎᔪᒧᑦ ᓯᕗᓂᒃᓴᒧᑦ.
ᐅᖃᐅᓯᕆᓗᒍ ᐃᓱᒪᓕᕆᓂᖅ ᐊᒻᒪᓗ ᖃᓄᐃᖏᑦᑎᐊᕆᐊᖃᕐᓂᖏᑕ ᐃᓚᑦᑕ, ᐃᓕᓐᓂᐊᕕᑦᑕ, ᐃᖅᑲᓇᐃᔭᕐᕕᑦᑕ ᐊᒻᒪᓗ ᐃᖅᑲᓇᐃᔭᖅᑎᐅᕙᒃᑐᑦ ᑲᒪᒋᐊᖓᓂᖅᐸᐅᓪᓗᑎᒃ ᐱᔨᑦᑎᕋᐅᑎᑎᒍᑦ ᐊᒃᓱᕈᓐᓇᕐᒪᑦ ᐊᒻᒪᓗ ᐱᔭᕆᐊᖃᓪᓕᕆᒃᑑᓪᓗᓂ ᐃᖅᑲᓇᐃᔮᖑᓪᓗᓂ, ᑭᓯᐊᓂ ᐃᓱᒪᒋᒃᑭᑦ ᐊᑐᖅᑕᐅᓕᕈᓐᓇᖅᑐᑦ ᓴᖕᓂᖅᓴᐅᓕᕐᓗᑎᒃ, ᐃᓗᓯᑦᑎᐊᕆᓐᓂᖅᓴᐅᓕᕐᓗᑎᓪᓗ ᒪᑭᑉᐸᓪᓕᐊᑦᓯᐊᕐᓗᑎᒃ ᓄᓇᓖᑦ.
ᐃᓕᓴᕆᔪᒪᕙᒃᑲ ᑲᓇᑕᒥᐅᑕᓕᒫᑦ ᐃᖕᒥᓐᓂᒃ ᐃᒃᐱᒋᒍᓃᖅᖢᑎᒃ ᐅᓗᕆᐊᓇᖅᑐᒦᒍᓐᓇᕆᐊᒃᓴᖅ ᐱᐅᓕᓂᐊᒐᖃᕐᓂᕐᒧᑦ ᐱᔭᕆᐊᖃᕐᓂᖅ ᐱᓪᓗᒍ ᐱᔨᑦᑎᕋᐅᑎᑎᒍᑦ ᖃᓂᒪᓐᓇᕐᔪᐊᖅᑕᖃᕐᓂᖓᓂ ᐅᕙᒍᑦ ᐅᓗᕆᐊᓇᖅᑐᒦᖁᓇᑕ. ᐱᔨᑦᑎᖅᓯᒪᒐᔅᓯ ᐅᕙᒍᑦ ᐊᖏᖅᕋᖅᓯᒪᖁᔭᐅᑎᓪᓗᑕ. ᖁᔭᓐᓇᒦᒃ.
ᑯᐃᓐᒧᑦ ᑭᒡᒐᖅᑐᖅᑎᒋᔭᐅᓗᖓ, ᐱᔨᑦᑎᓂᐊᖅᐳᖓ ᑖᓐᓇ ᐊᑐᖅᑕᕗᑦ ᒫᓐᓇᐅᔪᒥ ᐊᑐᕐᓗᒍ ᑲᓇᑕᒥ ᓄᓇᓕᖃᕐᕕᑦᑕ ᐊᑐᖅᑕᐅᓚᐅᖅᓯᒪᓂᐊᓕᕐᒥᓗᓂ ᐱᕙᓪᓕᐊᔭᐅᒃᑲᓐᓂᖁᓪᓗᒍ ᐃᖅᑲᓇᐃᔮᖑᓂᖓᑕ ᒥᑭᓪᓕᖅᑎᖅᑕᐅᓂᕆᕙᒃᑕᖓ−ᐋᖅᑭᒋᐊᕐᓗᒍ ᐃᓱᒪᓕᕆᓂᐅᑉ ᑕᑯᓐᓇᖅᑕᐅᖔᕐᓂᐊᕐᒪᑦ ᑎᒥᒃᑯᑦ ᐋᓐᓂᐊᖑᓂᖓᓂᑦᑕᐅᖅ, ᑕᐃᒫᔅᓴᐃᓇᕐᓗ ᑲᒪᒋᔭᐅᔾᔪᑕᐅᓗᓂ, ᐃᑉᐱᒋᔭᐅᑦᓯᐊᕐᓗᑎᒃ ᑐᑭᓯᐊᔭᐅᓗᑎᓪᓗ.
ᑕᐃᒪᖓᓂᒃ ᓱᓕᔪᒥᒃ ᑭᓪᓕᓯᓂᐊᕐᓂᕐᒧᑦ ᐊᒻᒪᓗ ᐋᖅᑭᖃᑎᒌᖕᓂᕐᒧᑦ ᐅᓂᒃᑳᓕᐅᖅᑐᖃᓚᐅᖅᓯᒪᑎᓪᓗᒍ ᐊᕐᕌᒍᑦ ᐊᕐᕕᓂᓕᑦ ᐊᓂᒍᖅᑐᓂ, ᐃᓕᑦᑎᑦᑎᒪᓕᕋᑦᑕ ᓄᓇᓕᕐᔪᐊᖑᓗᑕ ᐃᓕᓐᓂᐊᕆᐊᖃᕆᐊᒃᓴᑎᓐᓂᒃ ᐱᓚᕆᒃᑐᒥᒃ ᐊᑐᓚᐅᖅᓯᒪᔪᒥᒃ ᑲᓇᑕᒥ. ᐃᒃᐱᒋᑦᑎᐊᖅᓯᒪᓗᒍ ᑕᒪᓐᓇ ᓱᓕᓂᖅ ᓴᙱᓂᖅᓴᐅᑎᑦᑎᖕᒪᑦ ᑲᓇᑕᒥᐅᖑᓂᑦᑎᓐᓂᒃ, ᐊᑕᐅᓯᐅᖃᑎᒌᓕᖅᑎᓯᓪᓗᓂ ᑲᓇᑕᒥᐅᑕᓂᒃ ᐊᒻᒪᓗ ᐃᓕᓐᓂᐊᑎᖅᑎᑦᑎᓂ ᓱᕈᓯᑦᑎᓂᒃ ᑕᐃᒪᖓᓕᒫᖅ ᐱᓇᓱᐊᑦᑎᐊᕈᓐᓇᖅᑕᑦᑎᒍᑦ ᐱᓇᓱᐊᕆᐊᖃᕐᓂᑎᓐᓂᒃ, ᐱᓗᐊᖅᑐᒥ ᐊᒃᓱᕈᕐᓇᖅᑑᓕᕋᐃᒃᐸᑦ.
ᖃᐅᔨᔭᐅᕋᑖᕐᓂᖏᑦ ᓇᓗᓇᐃᖅᓯᒪᖏᑦᑐᑦ ᑭᒃᑯᕕᓂᐅᖕᒪᖔᑕ ᐃᓗᕕᖅᑕᐅᓯᒪᔪᑦ ᐃᓂᖓᓂ ᐃᓕᓐᓂᐊᕆᐊᖅᑎᑕᖃᑦᑕᓕᖅᑎᓪᓗᒋᑦ ᓇᔪᒐᐅᔪᓄᑦ ᐃᓕᓐᓂᐊᕕᖕᓄᑦ ᐱᓇᓱᐊᕈᓯᐅᕋᑖᔪᔪᓂ ᐃᖅᑲᐅᒪᐃᓐᓇᓕᖅᓯᒪᒐᒃᑭᑦ, ᑲᓇᑕᒥᐅᑕᐅᖃᑎᒃᑲᓗ ᑕᐃᒪᐃᒻᒥᔪᑦ.
ᐊᒥᓱᑦ ᐃᓄᐃᑦ ᐃᓱᒪᖕᒪᑕ ᐋᖅᑭᒋᐊᕐᓂᒧᑦ ᓴᐃᒻᒪᖃᑎᒌᓐᓂᐊᕐᓂᖅ ᐃᖅᑲᓇᐃᖅᑕᐅᓂᐊᕐᒪᑦ ᐱᓕᕆᐊᑎᒍᑦ ᐊᒻᒪᓗ ᐱᔨᑦᑎᕋᐅᑎᑎᒍᑦ. ᑲᓇᑕᒥᐅᑕᓕᒫᑦ ᐱᔨᑦᑎᕋᐅᑎᑎᒍᑦ ᐱᔨᑦᑎᕋᖅᑕᐅᑦᑎᐊᕆᐊᖃᖅᐳᑦ ᐊᑐᐃᓐᓇᖃᕐᓗᑎᓪᓗ ᑕᒪᒃᑯᓂᖓ.
ᑕᑯᓐᓇᖅᑕᕋ ᓴᐃᒻᒪᖃᑎᒌᖕᓂᖅ ᐃᓅᓯᕆᖃᓯᐅᑎᒐᑦᑎᒍ ᐊᒻᒪᓗ ᖃᐅᑕᒫᑦ ᐱᔭᒃᓴᕆᖃᓯᐅᑎᖏᓐᓇᖅᖢᑎᒍ. ᓴᐃᒻᒪᖃᑎᒌᖕᓂᖅ ᖃᐅᔨᖃᑦᑕᐅᑎᓕᕐᓂᐅᒻᒪᑦ ᐃᓅᖃᑎᒥᒃ.
ᐅᖃᐅᓯᐅᓯᒪᖕᒪᑦ ᑕᕝᕙᓂ ᓱᓕᔪᒥᒃ ᑭᓪᓕᓯᓂᐊᕐᓂᕐᒧᑦ ᐊᒻᒪᓗ ᓴᐃᒻᒪᖃᑎᒌᖕᓂᕐᒧᑦ ᑎᓕᓯᔾᔪᑎᒥᓂᕐᒥ ᐅᓂᒃᑳᓕᐊᖑᓯᒪᔪᒥ:
"ᓴᐃᒻᒪᖃᑎᒌᖕᓂᖅ ᐃᑲᔪᖅᑐᐃᔭᕆᐊᖃᖅᐳᖅ ᓄᓇᖃᖅᑳᖅᓯᒪᔪᓂᒃ ᐋᖅᑭᐸᓪᓕᐊᓂᖏᓐᓂ ᒪᒥᓴᕐᓂᒃᑯᑦ ᓱᕋᑦᑕᐅᒍᑕᐅᓯᒪᔪᓄᑦ ᐊᑐᖅᑕᐅᖃᑦᑕᖅᓯᒪᔪᑎᒍᑦ ᓯᕗᓕᕆᔭᐅᔪᓄᑦ ᓄᖑᑎᑕᐅᒐᓱᐊᕐᓂᒃᑯᑦ ᓱᕋᐃᓯᒪᑦᑎᐊᖅᑐᓂᒃ ᖁᕕᐊᓇᖏᑐᖅᑎᒍᑦ ᐃᓅᓯᖏᓐᓂ."ᖃᐅᑕᒫᑦ ᐃᖅᑲᐃᑎᑕᐅᔪᒍᑦ ᐊᓯᔾᔨᒌᖏᑦᑑᓂᖅ ᑐᙵᕕᐅᓪᓚᕆᒻᒪᑦ ᑲᓇᑕᒥᐅᑕᓄᑦ ᐱᒻᒪᕆᖁᑎᒋᔭᐅᓪᓗᓂ, ᑲᓇᑕ ᐱᓕᕆᒃᑲᓐᓂᕆᐊᖃᖅᐳᖅ ᐃᖅᑲᒋᑦᑎᐊᕐᓗᒋᑦ ᐅᖃᐅᓯᓕᒫᑦ, ᐱᖅᑯᓯᕆᔭᐅᔪᑦ, ᓇᑭᙶᖅᓯᒪᓃᑦ, ᐅᒃᐱᖅᑑᓃᑦ ᐊᒻᒪᓗ ᐃᓅᓇᓱᐊᕈᓰᑦ ᐱᐅᓯᕐᒥᒍᑦ.
ᑯᐃᓐᒧᑦ ᑭᒡᒐᑐᖅᑎᒋᔭᐅᓗᖓ, ᑭᒡᒐᑐᕐᓂᐊᖅᐸᕋ ᓄᓇᓕᑦᑕ ᐊᔾᔨᒌᖏᓐᓂᖓ ᐊᒻᒪᓗ ᐊᖏᖅᓯᒪᓂᖓᑦ. ᓱᓕᔪᕇᓐᓇᖅᓯᒪᒐᒃᑯ ᑕᓕᖅᐱᒻᒥ ᑲᑎᒪᔨ ᑭᒻ ᑳᒻᐳᓪ ᑲᓇᑕᒥ ᒪᑭᒪᑎᑦᑎᖕᒪᑦ ᐅᖃᕋᒥ ᐃᒫᒃ, “ᑲᓇᑕ ᐊᖏᕐᕋᕆᔭᐅᕗᖅ ᐊᔾᔨᒌᑎᑦᑎᔪᓄᑦ, ᓱᓕᔪᖅᓴᖅᑐᓄᑦ ᐊᒻᒪᓗ ᐅᒃᐱᕆᔭᒥᒍᑦ ᐃᓅᓯᖃᕈᓐᓇᖅᑐᓂᒃ.” ᐃᓕᓴᕆᓗᒍ ᐊᑕᐅᓯᖅ ᑕᓪᓕᒪᓂ ᑲᓇᑕᒥᐅᑕᐃᑦ ᐃᓅᓕᖅᓯᒪᖕᒪᑕ ᐊᓯᐊᓂ ᑲᓇᑕᐅᑉ, ᐱᒻᒪᕆᐅᒋᐊᒃᑲᓂᖅᐳᖅ ᑕᒪᔅᓱᒧᖓ ᐊᖏᖅᓯᒪᒃᑲᓐᓂᕆᐊᖃᕐᓂᕐᒥᒃ ᐊᑐᕐᓗᑕ.
ᑕᒪᓐᓇ ᑕᕝᕙᓃᓐᓂᑦᑕ ᑐᑭᖓ ᑭᐅᒧᑦ ᑭᒡᒐᖅᑐᖅᑎᐅᓂᐊᕐᓗᖓ, ᐊᒃᓱᕈᕈᑎᒋᓂᐊᖅᐸᕋ ᑎᒍᒥᐊᖏᓐᓇᖅᑕᐅᖁᓪᓗᒍ ᑭᖑᓂᑦᑎᓃᓕᖅᑐᑦ ᓯᕗᓂᒃᓴᑦᑎᐊᖃᖁᓪᓗᑕ, ᓯᓚᑐᕗᖅ ᐊᒻᒪᓗ ᐃᓱᒪᑐᓂᐅᓪᓗᓂ.
ᐃᓄᖁᑎᕗᑦ ᐃᓕᓴᖅᓯᒋᐊᖃᕐᒪᑕ ᐅᒡᒍᕆᖃᑦᑕᖅᓯᒪᔭᑦᑎᓐᓂᒃ, ᑕᒪᒃᑯᑎᒎᓇ ᐅᐱᒋᓕᖅᓯᒪᓪᓗᑕ, ᐱᔾᔪᑎᒋᓪᓗᒍ ᐱᕕᖃᖅᑎᑦᑎᖕᒪᑦ ᒪᒥᓴᕐᓂᕐᒧᑦ, ᐊᖏᕈᑎᖃᕐᓂᕐᒧᑦ ᐊᒻᒪᓗ ᓱᓕᔪᖅᓴᓕᒃᑲᓐᓂᖁᓪᓗᒍ ᑕᑎᖃᓕᒃᑲᓂᕐᓂᕐᒧᑦ. ᐊᔪᐃᓐᓈᕈᑎᖃᕐᓂᐊᖅᐳᖓ ᑕᒪᒃᑯᐊ ᐃᑳᕈᓯᐅᕐᓗᒋᑦ ᐊᔾᔨᒌᖏᑦᑑᓂᕐᒥᒃ ᐃᓅᓯᖃᕐᓃᑦ ᐊᒻᒪᓗ ᐃᓕᖅᑯᓯᖃᕐᓃᑦ ᑭᓇᐅᓂᑦᑎᓐᓂᒃ ᑕᑯᒃᓴᐅᑎᑦᑎᔪᑦ ᓄᓇᓕᕐᔪᐊᖑᓂᑎᑦᓂᒃ ᐊᔾᔨᖃᙱᑦᑐᒥ ᐊᒻᒪᓗ ᓯᕗᓂᕐᒧᑦ ᖁᓚᕐᓇᖏᑦᑑᓂᖏᑦ.
ᐊᖏᖅᐳᖓ ᑲᑎᖃᑎᒋᒍᒪᓂᐊᕐᓗᒋᑦ ᑲᓇᑕᒥᐅᑕᓕᒫᑦ ᓄᓇᓖᓪᓗ ᐊᕕᒃᑕᐅᓯᒪᓂᒃᑯᑦ ᐃᓕᒍᒪᓪᓗᖓ ᓯᕗᓪᓕᖅᐹᒥ−ᑖᒃᑯᓇᖓᑦ ᐃᓄᖕᓂᒃ ᓱᐅᒻᒪᖔᑕ ᐊᑐᖅᑕᖏᑦ, ᖃᓄᕐᓗ ᐋᖅᑭᒋᐊᖅᑕᐅᒍᓐᓇᕐᒪᖔᑕ ᐃᓅᓯᖃᑦᑎᐊᑲᓐᓂᓂᖅᓴᐅᖁᓪᓗᒋᑦ.
ᓴᙱᓂᖏᓐᓄᑦ ᑕᐃᒃᑯᐊ ᑭᒡᒐᑐᖅᑎᐅᖃᑦᑕᖅᓯᒪᔪᑦ ᓯᕗᓂᕐᓂ ᐱᔨᑦᑎᖃᑦᑕᖅᓯᒪᔪᑦ, ᑐᓂᕗᖓ ᑲᓇᑕᒥᐅᓄᑦ ᓯᕗᒧᑦ ᐱᓇᓱᐊᕐᓂᐊᕋᒪ ᒥᑭᓪᓕᑎᖅᓯᒪᓗᖓ ᐱᔾᔪᑎᒋᔭᕋᓗ ᓯᕗᓂᕆᓗᒍ ᑕᒪᓐᓇ ᑕᕝᕙᓃᓐᓂᑦᑕ ᑐᑭᖓ ᑲᔪᓯᓂᖃᕐᓂᐊᕐᒪᑦ ᐃᖅᑲᐃᖃᑦᑕᓛᓕᕐᒥᔭᕗᑦ ᐃᓚᓕᐅᑎᓛᕐᒪᑦ ᐊᑐᓚᐅᖅᓯᒪᔭᑦᑎᓐᓄᑦ.
ᕗᐃᑦᓗ, ᕿᒻᒥᕗᓪᓗ, ᓂᕙ, ᖁᕕᐊᓱᒃᐳᒍᑦ ᐅᐱᖅᑲᖅᖢᑕᓗ ᕆᑐ ᕼᐋᓪᒥ ᐃᓚᒌᓪᓗᑕ ᐊᖏᕐᕋᖃᕐᕕᒋᓂᐊᕋᑦᑎᒍ. ᐸᕐᓇᖃᓯᐅᑎᖕᒥᔪᒍᑦ ᓯᑦᑕᓕᐸᐅᔭᒥᓪᓗ ᐃᖅᑲᓇᐃᔭᕐᓗᑕ ᓄᓇᓕᐸᐅᔭᖓᓂ ᑯᐸᐃᑉ.
ᐅᐱᒍᓱᓪᓚᕆᒃᐳᖓ ᑕᒪᑐᒧᖓ ᑎᓕᔭᐅᒐᒪ ᐱᔨᑦᑎᖁᓪᓗᖓ ᐱᔪᓐᓇᖅᑕᒃᑯᑦ ᐱᓇᓱᐊᑦᑎᐊᕐᓂᐊᕆᕗᖓ ᖃᐅᑕᒫᑦ ᑕᒪᓐᓇ ᑎᓕᔭᐅᔾᔪᑎᒐᖓ ᑲᔪᓯᑎᑦᑎᐊᕐᓂᐊᕋᒃᑯ.
ᖁᔭᓐᓇᒦᒃ. ᒥᐊᖅᓰ. ᒥᒍᐊᑦᔅ. ᓇᑯᕐᒦᒃ.