ᓄᓇᕐᔪᐊᒥ ᐃᓄᑐᐃᓐᓀᑦ ᐅᓪᓗᖓᓂ ᐊᑕᓂᐊᓗᒻᒧᑦ ᑭᒡᒐᑐᕐᑎᑕ ᐅᖃᐅᓯᖏᑦ
ᐃᓄᑐᐃᓐᓇᐅᔪᖓ ᐅᐱᒍᓱᑦᓱᖓ, ᓄᓇᕕᒻᒥ ᐃᓅᓕᕐᓯᒪᔪᖓ, ᑯᐯᒃᒥ, ᑲᓇᑕᐅᑉ ᐅᑭᐅᕐᑕᑐᖓᓂ. 15,000-ᓃᒐᓚᑦᑐᓴᐅᓕᕐᑐᑦ ᐃᓄᑐᐃᓐᓀᑦ ᓄᓇᖃᕐᓱᑎᒃ 15-ᓂᑦ ᓄᓇᓕᓐᓂᑦ ᓄᓇᕕᓕᒫᒥ.
ᐃᓅᓯᕋᓂ ᐅᓂᒃᑳᓴᕆᓲᒃᑲ ᐱᑐᑦᓯᒪᕕᓖᑦ ᐱᒻᒪᕆᐅᑎᑦᓯᓂᕋᓂᒃ ᐅᖃᐅᓯᕐᖄᕋᓂᒃ - ᐃᓄᒃᑎᑐᑦ - ᐊᒻᒪᓗ ᐃᓅᖃᑎᑦᑕ ᐱᐅᓯᑐᖃᖏᓐᓄᑦ, ᐃᓄᑐᐃᓐᓀᑦ. ᓄᓇᒥ ᐃᒪᖏᓐᓂᓗ ᐃᓅᕕᖃᕐᓱᑎᒃ - ᐊᖑᓇᓱᒃᐸᓱᑎᒃ, ᐃᖃᓗᓐᓂᐊᐸᑦᓱᑎᒃ ᓂᕿᑦᓭᑐᕐᐸᓱᑎᓗ - ᐃᓅᓯᕐᒪ ᐱᒋᐊᕐᓂᖏᓐᓃᑐᓂ ᑐᖕᖓᕕᒋᔭᐅᓯᒪᔪᑦ. ᖁᕕᐊᒋᓂᕐᐹᕆᓯᒪᔭᒃᑲ ᐃᓚᖏᑦ ᑲᖏᕐᓱᐊᓗᒃᔪᐊᑉ ᑰᖓᑕ ᓯᓈᓂ ᑐᐱᕐᒥ ᓇᓚᑦᓱᑕ, ᕿᓯᕐᑑᑏᑦ ᐊᑭᕈᕕᓂᖏᓐᓂ ᑐᒃᑐᔭᓂᓪᓗ ᖄᖃᕐᓱᑕ, ᖁᐸᓄᐊᑦ ᐅᓪᓛᑯᑦ ᖄᕐᕿᓛᔪᑦ ᕿᖕᒦᓗ ᕿᓗᑦᑐᑦ ᑐᓵᑦᓱᒋᑦ ᐊᐳᑎᒥᓪᓗ ᐱᖕᖑᐊᕆᐊᒥ. ᑕᒪᒃᑯᐊ ᖁᕕᐊᓇᕐᑐᑕᓖᑦ ᐱᐊᕋᐅᓂᕋᓂ ᐊᐅᓚᔨᔭᒃᑲᓂ.
ᑭᓯᐊᓂ ᐊᓯᓕᒫᖏᑎᑐᑦ ᐅᓂᒃᑳᓴᕆᔭᐅᓲᓂ, ᖁᕕᐊᓇᖕᖏᑐᕐᑕᓕᓐᓂᒃ ᐅᓂᒃᑳᓴᕐᑕᖃᕐᒥᔪᐃ ᐃᓅᓯᕋᓂ ᐊᑑᑎᓯᒪᔭᒃᑲ. ᐅᓂᒃᑳᓴᕐᑕᓖᑦ ᐃᓄᒃᑎᑑᕐᓂᒥᒃ ᐃᓄᑐᐃᓐᓀᓗ ᐱᐅᓯᑐᖃᖏᓐᓂᒃ ᓱᕐᕃᒪᕆᒍᑎᐅᓯᒪᔪᓂᒃ ᐊᓯᕗᓐᓄᑦ ᐊᐅᓚᑕᐅᓕᕐᓂᕕᓂᕐᒧᑦ; ᐃᓅᓯᕋ ᐱᒋᐊᕐᖃᒥᐅᖏᓐᓇᑎᓪᓗᒍ ᖁᕕᐊᓇᕐᑐᑕᓖᑦ ᐊᐅᓚᔨᔭᒃᑲ ᓇᖕᒥᓂᒃᑲ ᐱᑕᖃᕐᑎᑕᐅᖕᖏᑐᑦ ᑲᓇᑕᒥᐅᑦ ᐅᓂᒃᑳᑕᖓᓂᑦ.
ᑭᓯᐊᓂᓗ, ᐊᕐᓱᕈᕐᓈᑐᒃᑰᖃᑦᑕᓱᓂ ᓄᒃᑭᔫᒥᖔᕐᓇᓲᖑᒻᒥᒪᑦ, ᐃᓄᑐᐃᓐᓀᓗ ᑲᓇᑕᐅᑉ ᐅᑭᐅᕐᑕᑐᓕᒫᖓᓂ ᓯᕗᒧᐊᕐᐸᓕᐊᒍᑎᑦᓴᓂᒃ ᖃᐅᔨᓯᒪᓕᕐᑐᑦ. ᐱᓇᓱᐊᖃᑎᒌᓚᐅᔪᕗᒍᑦ ᓄᐃᑦᓱᒍ ᓄᑖᖅ ᓄᓇᐅᑉ ᐊᒡᒍᑕᐅᓯᒪᒍᓯᖓ ᓄᓇᕗᑦ, ᐃᓄᑐᐃᓐᓀᑦ ᑖᕙᓂ ᓄᓇᓯᒪᔪᑦ ᐊᓂᕐᕋᖓ. ᐊᒻᒪᓗ ᑐᑭᓯᒪᖃᑎᒌᒍᑎᑦᓭᑦ ᒪᒥᖃᑎᒌᒍᑎᑦᓭᓗ ᖃᐅᔨᒪᔭᐅᓕᐅᒥᒍᑎᑦᓴᖏᓐᓂᒃ ᐱᓇᓱᐊᕐᓯᒪᑦᓱᑕ, ᐱᐅᓂᕐᓴᓄᑦ ᐊᓯᑦᔨᒋᐊᕈᑎᑦᓭᑦ ᑫᓪᓗᑐᕐᑕᐅᒍᑎᖏᓐᓂᒃ ᓄᕐᖃᐅᔨᒋᐊᖃᖕᖏᓂᑦᑎᓂᒃ ᖃᐅᔨᒪᒐᑦᑕ ᐱᐅᓯᑐᖃᑦᑎᒍᑦ ᑐᖕᖓᕕᒋᓲᑦᑎᓂᒃ ᐱᔪᓐᓇᐅᑎᕗᓐᓂᓗ ᐊᑐᕆᐊᓪᓚᓕᕐᑎᓯᒋᐊᖃᕐᓂᑎᓐᓂᒃ. ᐊᓯᕗᓐᓄᑦ ᐃᓗᕐᕈᓯᒧᐊᖓᔪᓂᒃ ᐅᖃᐅᓯᕐᒧᐊᖓᔪᓂᓪᓗ ᐃᓅᓱᑦᑑᑎᓪᓗᖓ ᐃᓅᓯᑦᓯᐊᒪᕆᐅᓯᒪᓂᖓᓂᒃ ᑕᑯᑦᓴᐅᑎᑦᓯᔪᓂ ᖃᐅᔨᔭᐅᑎᑦᓯᖃᑦᑕᓂᐊᕐᓂᒥᒃ ᑐᓂᒪᒍᑎᖃᕐᐳᒍᑦ. ᑐᑦᔫᒥᖃᑦᑕᑐᖓ ᐅᓂᒃᑳᓴᕗᑦ ᑕᑯᔭᐅᕙᓪᓕᐊᓕᕐᒪᑕ ᑐᓴᕐᑕᐅᕙᓪᓕᐊᖃᑦᑕᓕᕐᓱᑎᓗ, ᓂᑦᔭᓗᑦᑖᓂᒃᑯᑦ, ᓴᓇᖕᖑᐊᓂᒃᑯᑦ, ᐊᒡᓚᓯᒪᔪᓕᐅᕐᓂᑯᑦ, ᖃᐅᔨᓴᕐᓂᑯᑦ, ᐊᕙᑎᒧᐊᖓᔪᓂᒃ ᑲᒪᔨᐅᓂᒃᑯᑦ, ᐊᐅᓚᑦᓯᒍᓯᑖᕐᓂᑯᑦ ᐊᒻᒪᓗ ᑲᓇᑕᒥ ᐊᑑᑎᓯᒪᔪᓂᒃ ᑕᑯᓐᓇᒍᓯᕐᑖᓯᒪᓂᒃᑯᑦ ᓄᑖᓂᒃ.
ᑕᒡᒍᖓ ᐊᑕᓂᐊᓗᒻᒧᑦ ᑭᒡᒐᑐᕐᑎᐅᓂᕐᒧᑦ ᑎᓕᔭᐅᑦᓱᖓ - ᓯᕗᓪᓕᐸᐅᑦᓱᖓ ᓄᓇᖃᕐᖄᓯᒪᔪᒥᒃ ᑖᓐᓇ ᐃᓄᖃᕆᐅᕐᑎᓱᒍ - ᐅᐱᒍᓱᓐᓂᒪᕆᐊᓗᒻᒧᑦ ᑎᑭᑕᐅᓚᐅᔪᕗᖓ ᖃᐅᔨᒪᒐᒪ ᐅᖄᒍᓐᓇᕋᒪ ᑐᓴᕐᓴᐅᓯᐊᕐᓗᖓ ᐅᐱᒋᔭᖃᕐᓗᖓᓗ ᐃᓅᓯᕋᓂᒃ ᐊᑑᑎᓯᒪᔭᒃᑲᓂᓪᓗ, ᐅᖃᐅᓯᖃᕐᓗᖓ ᐃᓄᓐᓂᒃ ᐊᓯᖏᓐᓂᓗ ᓄᓇᖃᕐᖄᓯᒪᔪᓂᒃ, ᐊᒻᒪᓗ ᑕᒪᒃᑯᐊ ᑲᓇᑕᒥᐅᓕᒫᓄᑦ ᐅᖃᐅᓯᕆᒍᓐᓇᕋᒃᑭᑦ. ᐊᑕᓂᐊᓗᒻᒧᑦ ᑭᒡᒐᑐᕐᑎᒋᔭᐅᓂᕋ ᐃᓄᑐᐃᓐᓇᐅᓱᖓ ᑲᓇᑕᒥᐅᓕᒫᓄᓪᓗ ᐊᑕᓂᐊᓗᒻᒧᑦ ᑭᒡᒐᑐᕐᑎᒋᔭᐅᓂᕋ ᐱᔭᑦᓴᑕᖃᕐᓂᖓ ᐱᖕᖑᐊᖏᒻᒪᕆᑦᑐᒥᒃ ᐱᒻᒪᕆᐊᓘᑎᑕᕋ.
ᑲᓇᑕ ᓯᕗᒧᐊᕐᐸᓕᐊᓯᑎᓪᓗᒍ ᒪᒥᖃᑎᒌᒍᑎᑦᓴᓄᑦ, ᐃᓘᓐᓇᓯᐊᑕ ᐊᔪᐃᓐᓇᖃᑦᑕᕆᐊᖃᕐᖁᒍᑦ ᐃᓅᖃᑎᒌᖑᑦᓱᑕ ᑭᖑᓂᕐᒥ ᐊᑑᑎᓯᒪᔪᓂ ᖁᕕᐊᓇᖕᖏᓂᕐᓴᓂᒃ ᐅᓂᒃᑳᓴᕗᓐᓂᒃ ᐃᓕᑕᕐᓯᓗᑕ ᖃᓄᐃᓘᕈᑎᖃᕐᓗᑕᓗ - ᐊᑑᑎᓯᒪᔭᑦᑕ ᓱᓕᓂᖓᓂᒃ. ᒪᒥᖃᑎᒌᓐᓂ ᒪᓐᓇ ᐃᓅᓯᕐᒥ ᐱᐅᓯᖅ, ᐅᓪᓗᒥ ᓇᓪᓕᐊᓂᒃ ᐃᓱᓕᕝᕕᖃᑦᔭᒐᓂ. ᑕᒪᐅᖕᖓᓯᒪᑦᔭᖏᓪᓚᖓ ᐱᔭᕆᐊᑭᑦᑑᓚᖓᓂᕋᕐᓗᒍ ᐅᖃᐅᑎᒋᐊᕐᑐᓗᓯ. ᑕᒪᐅᖕᖓᓯᒪᕗᖓ ᐊᑑᑎᒋᐊᖃᕐᓂᕋᕐᓱᒍ ᐅᖃᕆᐊᕐᑐᓱᖓ.
ᐊᑑᑎᔭᐅᑎᓪᓗᒍ ᓄᓇᕐᔪᐊᓕᒫᒥ ᐃᓄᑐᐃᓐᓀᑦ ᐅᓪᓗᖓ, ᕿᓚᓈᕈᑎᓕᒻᒪᕆᐊᓘᕗᖓ ᓯᕗᓂᕐᒥ ᐱᐅᔪᓂᒃ ᐊᖏᕐᑕᐅᓯᒪᒍᑎᕗᓐᓂᒃ ᐊᒻᒪᓗ ᓯᕗᒧᑦ ᐃᓂᕐᕋᓕᕐᓂᑎᓐᓂᒃ, ᐊᑕᐅᑦᓯᑰᕐᓱᑕ.
ᒥᐊᔨ ᓴᐃᒪᓐ